Интернэтийн хязгааргүй орон зайд нэвтэрч, өөрийн ертөнцийг бусадтай хуваалцах боломж бол блог юм. Энэхүү боломжийг ашиглан та өөрийн үзэл бодол, авъяас, фото зураг, видео файл гээд хүссэн бүхнээ дэлхийн өнцөг булан бүрт суугаа хэн бүхэнтэй хуваалцаж, шүүмжлэл сонсож бас бичиж болно.

Блогийн төрөл:

Хүмүүс блогийг олон төрлөөр үүсгэж ашигладаг. Блогийг үүсгэхдээ ингэж төрөлжүүлэх нь уншигчдад улам сонирхолтой байх талтай байдаг. Жишээ нь:

-Та фото зураг сонирхогч бол өөрийн зургуудаар онлайн фото сэтгүүл үүсгэж болно. Ингэвэл энэ нь фото блогийн төрөлд хамаарагдана.

-Та хэрвээ видео сонирхогч бол өөрийн авсан бичлэгүүд болон бусад сайтуудад байгаа сонирхолтой видео бичлэгүүдээр блог үүсгэж болно. Энэ нь видео блогийн төрөлд хамаарагдана.

-Мөн дээр дурдсан текст, зураг, холбоос, видео бичлэг, аудио бичлэгийг хослуулан үүсгэж ч болдог.

- Блогийн агуулга бас чухал. Блогоо агуулга, сэдвээр төрөлжүүлэх нь уншигчдын сонирхлыг татах нэг нөхцөл болдог. Жишээ нь:

-Та хоол хийх дуртай бол олон төрлийн хоолны жороор дагнасан блог үүсгэж болно.

-Та улс төр сонирхдог, улс төрийн үйл явдлыг байнга дүгнэн шинжилдэг бол улс төрөөр дагнасан блог үүсгэж болно.

-Бас өөрийн ажил мэргэжлийн холбогдолтой блог үүсгэх нь ч сонирхолтой.

Таг гэж юу вэ?

Блогийн хуудсанд "Тагууд" (Tags) гэсэн хүснэгт байна. Энэ нь таны бичлэг юун тухай өгүүлэх гэж байгааг ганц хоёр үгээр тайлбарлана гэсэн үг. Гарчиг гэх юм уу даа. Бас шошго ч гэж нэрлэдэг. Блогт маш олон блог, бичлэгүүд байрлах бөгөөд энэ таг буюу гарчгийн тусламжтайгаар өөрийн сонирхсон мэдээллийг хялбархан хайж олох боломжтой. Та блогоо олон хүнд хүргэе гэвэл таг-аа маш оновчтой цөөн түлхүүр үгээр оруулах хэрэгтэй. Tag clouds (гарчиган үүл, шошгон үүл) нь нүүр хуудсан дээр тодотгосон байдаг.

Өөрөө өөртөө вэб мастер

Нэгэнт та блог үүсгэчихсэн, түүнийгээ байнга хөтлөн явуулж байхаар сэтгэл шулуудсан бол таны блогийн дизайн ямар байх, түүнийг хэрхэн эзэмших талаар товч танилцуулъя.

- Юун түрүүнд, хэрвээ та сонирхолтой мэдээ материал нийтлүүлээд байвал тухайн блогийг хэн хөтлөн явуулж байгааг уншигчид чинь сонирхох нь лавтай. Тэгэхээр блогийнхоо нүүр хуудсанд өөрийнхөө болон хамтран блог эзэмшигчийнхээ танилцуулгыг тавих боломжтой.

- Блогийг бусдаас ялгах гол зүйл бол мэдээж блогийн дизайн. Та блогийн үйлчилгээнд санал болгож буй бэлэн загваруудаас сонгож болно. Хүсвэл цоо шинэ загварыг өөрөө бий болгож болно. Явцын дунд ч дизайнаа солих, өөрчлөх боломжтой.

- Та блогийнхоо загварын тохиргоог виджетийн тусламжтайгаар хүссэнээрээ өөрчилж болно. Дуртай вэбүүдийн жагсаалт, бичлэгийнхээ төрөл, архив, өөрийн танилцуулга гэх мэтээр. Мөн таны блогт хэдэн хүн хандсан, яг одоо хэдэн хүн байна гэх зэрэг статистик үзүүлэлтийг байрлуулж болно.

- Блогтоо фото файл байрлуулах боломжтой. Үүнийг хийхийн тулд зураг оруулах гэсэн хэсэгт нэвтрэх шаардлагатай. Ингээд хүссэн зургаа блогтоо байрлуулах боломжтой.

- Бичлэгтээ сэтгэгдэл авах эсэхээ тохируулж болно. Үүний тулд сэтгэгдлийн тохиргооны хэсгийг ашиглаарай. Хэн нэгний бичсэн сэтгэгдэл таалагдахгүй байвал түүнийг устгаж болно.

GoGо сайтад блогтой болохын тулд та юун түрүүнд GoGo сайтын гишүүн болсон байх ёстой. Та энд дарж бүртгүүлнэ үү.

Үүнийхээ дараа та блогийнхоо нүүр хуудас руу энд дарж нэвтэрнэ. Ингээд өөрийн хаягаараа нэвтрэн орж шинэ блог үүсгэнэ.

Блогийн нэр: Энэ нь таны блогийн нэр. Өөрөөр хэлбэл таны блогийг нээхэд блог загварын тань толгой хэсэгт гарч ирэх нэр юм.

Блогийн тайлбар: Та блогтоо ямар ч тайлбар өгч болно. Ихэнх тохиолдолд блогчид энд өөрийн блогт бичих зүйлсээ тоймлон нэг хоёр үгээр өгсөн байдаг.

Блогийн URL: Энэ нь таны блог руу нэвтрэн орох линк юм. Тиймээс та хүн цээжлэхэд хялбар URL-ийг сонгохыг танд зөвлөж байна.

Нийтлэгчийн нэр: Энэ блогийг чухам хэн гэдэг хүн хөтлөн явуулж байгааг харуулна. Та энд өөрийн nickname-ийг өгч болно.

Ингээд загвараа сонгосоны дараа та өөрийн блогтой болно.

Хэдийгээр блог нь таны чөлөөтэй хэвлэн нийтлэх эрхийг хангасан ч зарим анхаарах зүйлс байгааг таньд сануулах нь зүйтэй болов уу.

Юун түрүүнд Таны нийтэлсэн ямар ч зүйл /фото, текст, видео файл/ Монгол улсын хууль дүрмийг хангасан байх шаардлагатай. Тухайлбал Монгол Улсын Садар самуун явдалтай тэмцэх тухай, Архидан согтуурахтай тэмцэх тухай, Зохиогчийн эрх болон түүнд хамаарах эрхийн тухай, Зар сурталчилгааны тухай зэрэг хуулиудыг таны блогт багтсан бичлэг зөрчөөгүй байх ёстой.

Мөн та өөрийн онлайн чөлөөт орон зайгаа ашиглан бусдын нэр хүндийг гутаан доромжлох, гүтгэх нь ёс бус юм. Блогийн бичлэг болон бусдын блогт оруулах сэтгэгдлийн хэсэгт хараалын үг хэрэглэх, ёс бус үгс бичих нь ёс суртахуунгүй үйлдэл болохыг эрхэм Та ухамсарлана биз ээ.

Хэрвээ блог хөтлөгчийн зүгээс ёс бус, хууль бус үйлдэл хийвэл админы зүгээс сануулах ёстой бөгөөд энэ үйлдэл удаа дараа давтагдвал админ блогийг устгах хүртэл арга хэмжээ авах эрхтэй.

Жич: Та Монгол Улсын зохих хуулиудын талаарх мэдээллийг www.legalinfo.mn сайтаас хүлээн авч үзнэ үү.